Era Associacion de Municipalitats entara Independéncia de Catalonha (AMI) que s’amassèc agèr ena Val d’Aran damb eth Sindic d’Aran, Carlos Barrera, e damb eth baile de Vielha e Mijaran, Àlex Moga.

Eth Sindic d’Aran, Carlos Barrera, e eth baile de Vielha e Mijaran, Àlex Moga, que s’amassèren agèr damb es bailes de Vic e de Balaguer (Païses Catalans), Josep M. Vila d’Abadal e Josep M. Roigé, que son respectivaments president e vicepresident dera Associacion de Municipalitats entara Independéncia de Catalonha (AMI).
 
Ena reünion Vila d’Abadal e Roigé que presentèren era AMI as autoritats araneses e qu’expliquèren era situacion de Catalonha tre era grana manifestacion independentista que se debanèc en Barcelona eth passat 11 de seteme.
 
Ath delà, era AMI que manifestèc que sostieràn eth projècte de país e era volentat deth país occitan: “Aran coma país a de hèr eth sòn projècte e aguesta Associacion li darà supòrt” ce diguèc Josep M. Vila d’Abadal, president dera AMI.
 
Deth sòn costat Moga declarèc que s’amassarà damb es municipalitats dera Val d’Aran entà elaborar un document que presentaràn ath Sindic d’Aran. Segontes Moga, “entà Aran se daurís ua possibilitat de reconeishement nacionau laguens d’ua grana nacion qu’ei Catalonha”.
 
Barrèra declarèc qu’era amassada d’aué entre eth president dera Generalitat de Catalonha, Artur Mas e eth president der Estat espanhòu, Mariano Rajoy, e “serà detonanta entà mercar un camin de reflexion entath present e futur deth nòste país”. “Eth futur d’Aran ei junhut damb eth de Catalonha coma ei estat ath long des ans. S’eth futur ei esperançador e de progrès entà Catalonha, tanben ac serà entà Aran” ce diguèc eth Sindic.
 
Fin finau, donques, que podem prevèir qu’en cas dera creacion d’un nau estat en Euròpa, be se poderie nomentar Catalonha e Aran, damb eth catalan e er occitan de lengües oficiaus en madeish reng.
 
Era AMI, qu’ei ua associacion qu’a per tòca de vier un espaci de debat a on compartir idèes, iniciatiues (legaus o civiques), experiéncies, informacions, esturments de gestion e tot çò que pogue èster util entà portar ath pòble de Catalonha ara independéncia. Que trabalhen tanben en fomentar e deféner es drèts nacionaus e en conscienciar as ciutatans deth besonh dera independéncia de Catalonha.
 
Aquera associacion de municipalitats independentistes qu’a creat un hilat de promocion exterior, mès que mès en encastre dera Union Europèa, que promò eth finançament des municipalitats e que cèrque sinergies enes airaus financèr e d’enterpresa.




Ferriòl Macip